Dä Samichlaus chunnt
Es Liechtli brennt im Tannewald,
was sött au das bedüte?
Chunnt ächt dä Samichlaus scho bald?
I ghör äs Glöggli lüüte.
Es isch dä Chlaus mit schwäre Schritt,
chömed und lueged gschwind!
Er treit en Sack voll Nüssli mit,
für alli, alli Chind.
Jetzt mues ich nüme warte
Jetzt mues ich nüme warte,
jetzt bisch Du endlich do.
Sitz Samichlaus do ane,
Du muesch nöd länger stoh.
Bisch sicher müed vom Laufe,
ii gseh der s'doch grad a,
drum muesch din Sack, din schwäre,
jetzt nüme länger ha.
So leg en uf de Bode,
es hät en huufe Platz.
Weisch Samichlaus, für d'Ruete
isch das de bescht Ersatz.
Samichlaus, wo chunsch du här?
Samichlaus, wo chunsch du här?
Siebehundert Stund wiit här!
Samichlaus, isch s’Säckli schwär?
Siebehundert Pfund isch’s schwär!
Samichlaus, machs schnäll läär!
Denn isch s’Säckli nüme schwär!
Samichlaus, ich bi so froh
Samichlaus, ich bi so froh,
dass du hüt zu mir bisch cho.
Du weisch, ich tue gern Nüssli ässe,
hesch mis Säckli nöd vergässe?
S’ Luusmaitli
Lueg, Samichlaus, ich bi no chli,
und mängisch es Luusmaitli gsi.
Du weisch, ich cha au ganz e liebi si,
drum, chum doch wieder mal vorbi.
Ei Frog hani no zum Schluss,
Wieviel Nuss gisch mer für en saftige Kuss?
Du Samichlaus, verstohsch üs Chind
Du Samichlaus, verstohsch üs Chind,
du weisch, dass mir kei Engel sind.
Chunnsch go luege, was mir mached,
wie mir singed, spieled, lached.
Tuesch üs lehre Liebi z'verschenke,
au chli a die andere z'denke.
Nur so simmer selber froh,
und d'Wiehnachtsfreud chan zu üs cho.
Samichlaus du guete Maa
Samichlaus du guete Maa,
gell i mues kei Ruete ha?
Gib mir lieber es paar Nüssli,
denn gib i der defür es Küssli!
I bin en chline Stumpe
I bin en chline Stumpe,
cha no nöd richtig gumpe,
aber eis chan i dir säge,
en Sack mag i scho träge!
I bi en chline Stumpe
Ich bi en chline Stumpe,
tue gärn chli umegumpe.
Ä Lumpeornig mache,
mit mine vielnä Sache.
Tue mängisch gar nöd lose,
ha Fläcke i de Hose.
Tue vielmol umestoh,
statt schnell hei-zue-goh.
Doch dörfsch ruhig s'Mami froge,
ich tue keis Tierli ploge.
Drum Chlaus bis bitte en Guete,
verschon mi vor de Ruete!
Bring lieber gueti Sache,
zum mir e Freud z'mache!
Und gäll, säb weisch sit färn,
ii ha mis Mami gärn!
Bi üs i de Stube isch's warm
Bi üs i de Stube isch s'warm und still,
will der Samichlaus üs hüt bsueche will.
Ich hetti scho meh sölle folge dur s'Johr,
und weniger striite, das isch wohr.
Doch häsch sicher au viel Freud a mir gha!
Gäll Samichlaus, defür dörf ii es paar feini Sache ha?
Ich danke Dir
Für vieles stellt mer hüt Roboter a,
mer seit ohni Computer chas nöd gah.
Es git Ragete und Satellite,
und doch wird uf de Erde immer no gschtritte.
Mer schafft vieles ab und tuet ume hetzte,
nur dich Samichlaus cha niemer ersetzte.
Du lasch dich nöd vom Moderene la leite,
und läbigi Schmutzli tüend dich begleite.
Ziehsch all Johr z'fuess dur üses Land,
treisch immer s'rote und goldige Gwand.
Für jedi Familie häsch Ziit und machsch halt,
drum danke ich dir im Name vo Jung und Alt.
Samichlaus du guete Maa
Samichlaus du guete Maa,
ändlich bisch du wieder da.
Chunsch cho luege was ich mache,
wie ii spiele, singe und lache.
Tuesch mi lehre s'Herz z'verschenkä,
au chli a di andere z'denkä.
Nur so bin ii selber froh,
und s'Christchind cha zue mir cho.
Heiterebeck!
Samichlaus, ii freue mi,
äntli bisch du cho!
Wiso hesch de Esel nöd
au grad ine gno?
Heiterebeck! De armi Kärli,
immer muess er warte!
Hätt ihm gern mis Zimmer zeigt
und verzellt vom Chindergarte.
S'Bastelzüüg und überhaupt,
all min tolle Plunder.
Samichlaus, chasch sicher si,
es nähmt de Esel wunder.
Samichlaus, wenn wieder chunsch,
bitte dänk den dra,
lass dä Esel s'nächste Johr
nöd verrusse stoh!
Samichlaus, i han e Frog
Samichlaus, i han e Frog
säg, was machsch Du jede Tag?
Flügsch im Summer au devo,
uf en Insle irgendwo?
Liisch mit de Badhose am Strand
und hesch es Glace i de Hand?
Gohsch go fische mit Dim Bart,
oder machsch e Stadtrundfahrt?
Oder blibsch Du gärn dihei?
I Dim Wald so ganz ällei?
Höcklisch gmüetli vor Dim Huus?
Säg mer's bitte Samichlaus, ii lach Di bestimmt nöd us!
Dä Samichlaus, er chunnt, er chunnt
Dä Samichlaus, er chunnt, er chunnt!
Er lauft mit schwärem Schritt!
Er hät halt grossi Stiefel ah,
i dere chalte Ziit.
Jetzt han ich sini Glogge ghört,
ich weiss was das bedütet,
wänn's uf de Strass und vor em Huus
am Abig e so lüütet.
Dänn chunt de Chlaus i d’Stube ie
und seit: So, so, ihr Chinde,
i glaube fascht, i ha für eu
kei Ruete müese binde!
En Sack voll Nusse han i do,
ihr werdet jo scho plange.
Und wer fascht immer gfolget hät,
de dörf in Sack ielange!
Ach du liebe Samichlaus
Ach du liebe Samichlaus,
endlich bisch du da.
Ich bi ganz fescht ufgregt,
gell das gsesch mer a.
Jetzt won ich dich vor mer gseh
isch alli Angscht verbii,
numme no e grossi Freud,
dass du bi eus chasch sii.
S'isch nöd immer all's guet grote
sit em letschte Johr.
Aber Müeh das han ich mer gä,
glaub mer, das isch wohr.
Für alles was du mir jetzt gisch,
dank ich dir ganz fescht.
Und hoffe, dass au s'nöchschti Johr
Ziit für mich denn häsch.
Oh Samichlaus, oh Samichlaus
Oh Samichlaus, oh Samichlaus
Jetzt bisch Du ändlich do.
Es hät mer chli Angscht g'macht
Das mues der offe g'stoh.
Doch merk ii jetzt, Gott Lob und Dank,
Du bisch en guete Maa.
Verstohsch üs Chind und häsch üs gern,
das gseht mer dir grad aa.
Kännsch allwäg mini Fähler scho
und weisch um alles B'scheid.
Han poosget do und poosget döt,
jetzt tuet's mer aber leid.
Wenn jedes miecht was sött,
wär's schöner uf de Erde.
Was mich betrifft versprich ii Dir,
es wird jetzt besser werde!
Dass ii das nöd so schnell vergiss
und immer fescht dra denkä,
tue Du mir bitte als chlini Hilf
es Hämpfeli Nüssli schenkä.
Gwundernase
Gäll Samichlaus, johri, johrus
wohnsch Du ällei i dim Huus?
Isch das für Di nöd mängisch schwär,
Wötsch nöd, dass öpert bi Dir wär?
Wem chasch Du denn am Obig prichte,
und wem verzellsch du Dini Gschichte?
Und bisch mol chrank, wär luegt zu Dir,
und macht Dir Tee und wäscht Dir s'Gschirr?
Wend truurig bisch, wär tröschtet Di,
mit wem trinksch Du Dis Gläsli Wii?
Weisch Samichlaus, ii glaube halt,
Du redsch mit de Tier im Wald!
Verstohsch Du d'Reh und d'Füchs und d'Hase?
Gäll Chlaus, ii bi ä Gwundernase.
Ich ghöre öppis lüte
Ich ghöre öppis lüte,
was chönnti ächt das sii?
Ich stoh ganz still und warte,
de Samichlaus chunnt zur Türe ii.
Au wenn ich nöd immer lieb bi gsi,
Samichlaus, das isch verbii.
Vo jetzt a will ich s'besser mache,
nöd immer striite, zwängele und krache.
Zum Schluss gib ich dir d'Hand ganz gschwind,
denn gosch du wiiter zu dä nöchste Chind.
Viel z'schnäll goht so en Tag vorbii,
zrugg bliebt no lang en wunderbare Schii.
Samichlaus, wohn bi üs
Du, Samichlaus, säg, isch das wohr
Dass du ällei wohnsch s'ganzi Johr?
Ich find, e so en alte Maa
müesst Fründe um sich ume haa.
Chumm doch und wohn i üsem Huus,
das macht de anderä glaub nünt us.
Mir würded für dich choche, bette,
putze, wösche, suuge, glettä.
Würded hälfe Guetzli bache,
Schoggi schmelze, Säckli mache.
Nussboim hämer viel dihei,
nu Manderinli wachsed leider kei.
Au din Esel dörf do sii,
im Gartehuus, mir richteds ii.
Und uf em Rase chönnt er weide,
chömed doch zu üs, ihr beide!
Das isch für eu doch sicher guet,
wenn öpper für eu sorge tuet.
Drum loh der's dur de Chopf lo goh,
und lüüt mer noch de Wiehnacht aa!